ازيكم و اهلا بيكم في مدونه جديده, عايز تبدأ يوتيوب بس خايف؟ مش عارف تبدأ ازاي ؟ في فيديوهات كتير جدا علي اليوتيوب بس بردوا مش عارف تجمع افكارك و تفهم تبدأ ازاي ؟ يبقي الفيديو ده عشانك,


هقولك في الفيديو او التدوينه دي ازاي تسجل صوت و تختار زاويه تصور بيها فيديوهاتك و ازاي اصلا تبدأ علي اليوتيوب و متعملش نفس الغلطات الي انا عملتها اول ما بدأت يوتيوب و كمان ب500ج فقط,

اول حاجه :

هتنزل تشتري مايك, روحت يمين روحت شمال اتشقلبت مفيش غني عن المايك لازم تجيب مايك ده اهم حاجه و ارخص مايك هو البويا by m1 ب 150ج.م و ده اساسي طول ما انت عايز تعمل فيديوهات,

تاني حاجه :

متبدأش علي يوتيوب, نعم ؟؟؟؟, ايوه متبدأش تنزل فيديوهات علي يوتيوب لان انت هتبدأ هتكون خايف و هتكون بتهته و تتلغبط في الكلام و مش مستريح قدام الكاميرا, حل المشكله دي انك تعمل 10 فيديوهات تخطط و تصور و تمنتج و تعمل صورة مصغره كمان و تشوف الفيديوهات دي كلها و توريها لصحابك و اهلك و الناس القريبه منك وتاخد رايهم قبل ما تبدأ, هتستفيد من راي الناس في المحتوي بتاعك, هتعرف اخطاء تصلحها, هتبقي متعود اكتر علي الكاميرا مش هتبقي خايف منها, وبعد كدا تقدر تبدأ تنزل فيديوهات علي اليوتيوب او الفيس او اي منصة تفضلها,

ثالث حاجه :

لازم ترايبود زي ما لازم مايك: هتحتاج الترايبود ده اساسي عشاان تثبت الكاميرا او الموبايل بتاعك كويس مش عايز كادر مائل او مش مضبوط سعر ترايبود كويس 220ج تقريبا, و ده ينقلنا للكادر, اختار الكادر او الزاويه علي حسب المكان الي انت فيه و يكون خلفية هادية مش لافته و مش مكركبه, حاول علي قد ما تقدر تكون خلفية الفيديو بتاعك بسيطة جدا,

رابع حاجه :

الاضاءه انت مش محتاج اضاءه اللا لو فعلا المكان الي فيه مش بيسمح غير بكدا, يعني لو عندك شباك او بلاكونه بتدخل نور الصبح بدري ف صور عندها, لكن لو المكان زاويته مش كويسه ف هتحتاج اضاءه, و مش غاليه لمبتين ليد من فينوس 11 وات هتكون كافية مع سوفت بوكس تعمله بالكرتون مش هيعدي تكلفة 150ج او تجيب رينج لايت اضاءتها كويسه وكبيره شويه بتبدأ من 120ج الي 200ج متجبش رينج لايت اغلي من كدا واهم حاجه زاوية الاضاءه مش قوتها لازم تكون الاضاءه عاليه شويه و هكلم في فيديو منفصل عن الاضاءه و تاثيرها علي جوده الفيديو,

خامس نقطه :

المونتاج, لازم تتعلم مونتاج اذا كان علي الكمبيوتر او الموبايل, في برامج كتير مجانيه منها VN علي الموبايل بسيط و قوي, و في hitfilme express او دافنشي علي الكمبيوتر مش لازم تدفع فلوس ف برامج في الاول,

اخر نقطه :

تتعلم ازاي تعمل صورة مصغره و ال SEO كنت عامل فيديو عن الصورة المصغره و في كتير علي يوتيوب عن الموضوع ده اما ال SEO - Search engine optimization ف ده موضوع كامل لوحده بس باختصار ده الي بيساعد الفيديو بتاعك يظهر لجمهور جديد و اكبر.
هيكون في سلسله عن كل نقطه اتكلمت عليها بالتفصيل ازاي تعمل فيديو علي اليوتيوب كورس اليوتيوب هينزل قريب, سلام.