قطاع المشروعات السرية X جوا شركة ألفابت شغال على مشروع من 3 سنين واسمه Wolverine، وده فكرته انه جهاز سمعي بيخليك تقدر تركز على مصدر صوت معين في وسط زحمة أصوات.. ويخليك تسمع دبة النملة لو ف وسط دوشة🤯
النموذج الأولي كان تصميمه مغطي الأذن كلها، بس بالتطوير التصميم صغر وبقى ممكن يبقى جوا الأذن، مفيش صور ولا أي حاجة عن موعد طرحه!
🌟 إنتل كشفت انهاردة عن نظام مرعب 🙈
النظام ده اسمه 3D Athletes Tracking وده ياسيدي فكرته معتمدة على مجموعة مستشعرات وكاميرات بتصور الرياضيين وهم بيجروا أو بيمارسوا أي رياضة، وتحلل طريقة حركة هيكلهم العظمي وتقارنه بحركة هيكل المنافسين، بحيث يتعرف فين نقط القصور عند الرياضيين والمدربين يقدروا يشتغلوا على نقط الضعف دي ويطوروها!
العظمة في السيستم ده انه مبيعتمدش على سينسورز تتركب على جسم الرياضي، انما كل حاجة بتبقى في كاميرا بتتمسك باليد! 😎
🌟 جوجل أعلنت انها هتسرع عملية وصول المزايا الجديدة للمستخدمين على كروم، فبدل ما كان بينزل إصدار جديد كل شهر ونص، لأ هينزل اصدار جديد من كروم كل شهر، مع تحديثات امنية كل أسبوعين!
تطبيق النظام ده هيحصل من أول كروم 94 في الربع التالت من السنة دي!
🌟 يوتيوب أعلن انه مش هيرفع الحظر عن تشانل ترامب إلا بعد ما يتأكد تماما ان خطر حدوث فوضى وعنف في أمريكا بقى أقل!
بالمناسبة تشانل ترامب على يوتيوب معمولها بلوك من 12 يناير اللي فات!
🌟 قطاع الذكاء الاصطناعي جوا فيسبوك FAIR قدر يطور نظام إلكتروني جديد بيقدر يعلم نفسه بنفسه من خلال أي صور بيشوفها ومبيحتاجش كمان ان الصور تبقى متعرف بتبويبات وتصنيفات Labels!
وعشان فيسبوك يقدر يعمل السيستم بجودة عالية على التعامل مع أي صور يقابلها، السيستم تم تدريبه على داتا مكونة من مليار صورة من الانترنت🤯
🌟 شركة Zimperium للأمن المعلوماتي قدرت تكتشف 11,877 أبلكيشن على أندرويد 6,608 أبلكيشن على iOS مش مأمنين الداتا بتاعت المستخدمين كويس على سيرڤرات استضافة الداتا دي، لدرجة ان بسهولة اي هاكر يقدر يسرق الداتا دي من السيرفرات بما في ذلك باسوردات المستخدمين وبياناتهم الشخصية وساعات بيانات حساسة عن صحتهم!!
🌟 شركة Square الخاصة بالتحويلات المالية، بتاعت مدير تويتر جاك دورسي، اشترت الغالبية العظمى من أسهم شركة Tidal الموسيقية بتاعت أسطورة الراب Jay Z في صفقة بقيمة 297 مليون دولار!
🌟 كوالكوم أعلنت عن تقنية جديدة Snapdragon Sound واللي هتخلي السماعات الوايرلس من أندرويد تقدر تنافس آيربودز أبل!!
مبدئيا التقنية الجديدة هتحسن جدا جودة الصوت من السماعات الوايرلس وتبقى زيها زي السماعات السلك وأحسن كمان، جودة الصوت في المزيكا والمكالمات والجيمز هيتطور جدا، خصوصا كمان ان معدل تأخير وصول الصوت بين المتكلم والطرف التاني هيبقى يادوب 89 مللي ثانية، ضيف لكدا كمان ان التقنية هتقدم ميزة Spatial Sound، يعني لما تتحرك حوالين موبايلك، هتحس ان الصوت بيتحرك ف ودانك على حسب مكانك بالمسبة لموبايلك أو مصدر الصوت المتوصل بيه سماعتك أيا كان زي بظبط الايربودز دلوقتي، كمان برضو ميزة التبديل بين الاجهزة بسهولة وأوتوماتيكيا حسب الجهاز اللي بتستخدمه حاليا هيبقى عظيم، وده برضو متوفر من أبل!
التقنية دي بتحتاج شرايح بلوتوث معينة لازم تبقى موجودة في الموبايلات وكمان سماعات البلوتوث، وهيبقى موجود على علب الاجهزة والسماعات دي علامة مميز تقول انهم بيدعموا التقنية الجديدة، وأول شركتين تم اعلانهم انهم هينزلوا منتجات بالتقنية دي هم شاومي وAudio-Technica!
🌟 تقرير جديد بيأكد ان أجهزة ايباد وماك بوك نازلة بشاشاتOLED على 2022!!
🌟 الكونجرس الأمريكي بيطالب هيئة الاتصالات الفدرالية انها ترفع الحد الأدنى لسرعات الانترنت داونلود وأبلود إلى 100 ميجابت في الثانية الواحدة!
🌟 سامسونج كشفت عن الجيل الجديد من تقنيتها لسينسورات التصوير ISOCELL 2.0 واللي بتركز بشكل رئيسي على تطوير طريقة تصميم مستشعرات الكاميرات، بحيث انها هتطور من مكونات المستشعرات نفسها، فبدل ما كان بيتم الفصل بين فلاتر الألوان في السينسور بحواجز معدنية، هيتم الفصل بمادة متطورة جديدة بتساعد على تقليل فقدان أشعة الضوء وبالتالي تقدر الكاميرا تلقط صورة واضحة كواليتي عالية وفي نفس الوقت ألوانها دقيقة وزاهية!
🌟 رئيس مايكروسوفت براد سميث هيقدم وجهة نظره في جلسة استماع بالكونجرس الأمريكي بخصوص قوانين جديدة بيناقشها الكونجرس لتنظيم علاقة الاعلام بالشركات التقنية، ومش عايز اقولك طبعا أن مايكروسوفت كانت من أكتر الشركات اللي بتحرض أستراليا والإتحاد الأوروبي على فيسبوك وجوجل بخصوص انهم لازم يدفعوا العملاقين فلوس مقابل انهم يستخدموا المواد الصحفية بتاعت المواقع الاخبارية على منصاتهم الالكترونية!
مايكروسوفت هتستفيد ايه؟! 🙄
محرك بحث Bing يكسب مصداقية كبيرة لو جوجل سيرش اتضرب لان جوجل سيرش من أكتر اللي بيستفيدوا من المواد الاخبارية في نتايج البحث بتاعته!
🌟 امبارح هيصت وزيطت على ان اختبار اطلاق نموذج صاروخ سبيس اكس ستار شيب اللي اسمه SN10 نجح اخيرا في تحقيق هبوط عظيم..
انهاردة اكتشفت ان بعد ما الصاروخ نزل وعمل هبوط ولا أروع.. هووووب عدى 8 دقايق على هبوطه، وقام منفجر💥🔥🤣
طول عمري بقول إيلون ماسك ده بومة..🦉
#المصدر (تكنولوبيا)
0 تعليقات